Obiter Dicta

Orain dela sei bat urte erdipurdikoa bezain atsegina zen M-Clan-en abesti batek sinetsiarazi zidan karisma zein web-orririk gabe ez zarela inor; beraz gaur, beste edonork bezala,blog propioa dut. Mesedez, mesedez, gorde txaloak eta lausenguak, eta utzidazue hitz egiten!

Esan nahi nuena da morroi ororen ametsa dela lanik egin gabe bizitzea, eta ezinean, bere zaletasuna diru-sarrera oparoa bihurtzea, eta beraz blog bat jarri eta berehalako pausua dela publizitatea jartzea. Eta orijinalitatea garestia denez, hobe da errazera jotzea, eta mundu guztiak darabilena hartzea, Google Adsense.

Ziur badirela milaka publizitate-orri milioika aldiz hobeak, baina ez dut buruhausterik nahi, gai honetan nahiago dut artaldeari jarraitu. Gainera, izan gaitezen errealistak: blogaren lepo bizitzea gure hariak trebeziaz mugitzeko gai diren jeinu bakan batzuen esku besterik ez dago. Gainontzekoek publizitatea jolasteko besterik ez dugu erabiltzen. Haren bitartez aberastu nahi banu, jai nuke. Aurtengo urtarriletik gau bitartean 20 dolaretako irabaziak ditut pilatuak, eta kontutan hartuta Google-ek ez duela ordaintzen 100 dolar pilatu bitartean, itxoiteaz aspertu naiteke. Eta bitartean beraiek nire diruak ematen dituen interesekin aberasten ari dira! Bi urte barru, gutxieneko 100 dolarrak bilduko ditudanean, ez dut jaking zertan xahutu halako dirutza.

Eta honela bururatu zait, ez al da egongo diru horretaz xedatzeko modurik 100 dolarretako kopuru magiko horretara heldu baino lehen, Google Adwordsen inbertitzeko? Horrek publizitatearekin jolasteko aukera berriak irekiko lizkidake: nik Google-i baimena emango nioke nire blogean beste pertsonen iragarkiak jartzeko Google-ek niri ordaintzeko, eta Google-ek nirekiko zorretan edukiko lukeenarekin, nik Google-i ordainduko nioke beste pertsonen web-orritan nire iragarkiak jartzeko. Hau da, nik ez nukeela sosik hartuko. Esteken trukatze-sistema bat bezalakoa izango litzateke, baina Google bitartekari-lanetan asmakizunaz probetxu atereaz.

Bururapena ez da berria, bada denbora Yahook halako zerbait ahalbidetzen duela. Hala ere, urteak dira Google AdSense/AdWords-en erabiltzaileek berdina itxaroten dutela Google-engandik, eta Google-ek dio oraingoz ezetz, ordainketa-moduak daudenak direla, eta kitto. Beraz, AdSense-eko irabaziak AdWords-eko publizitate-kanpainetan inbertitu nahi duenak dirua txeke zein banku-transferentziaz bidaltzea eskatu beharko dio Google-i, ondoren diru hori hartuko du, eta berriro Google-i bueltan bidaliko dio, jasotako publizitate-zerbitzuen ordainetan.

Hori guztia alde batera utzita, blogaren publizitatea kudeatzeko erabiltzen dudan plugin-ak aukera ematen dit Google eta Yahooren publizitatea aleatorioki txandakatzeko. Kontutan hartuta Yahook utziko didala sosak zerbitzu batetik bestera mugitzen, agian aukera bat emango diot.

Esta entrada fue publicada el Saturday, 12 de July de 2008 a las 18:07 y está clasificada bajo: Informática y tecnología, Webmaisulana. Puede hacer un seguimiento de los comentarios de esta entrada gracias al feed RSS 2.0. Puede dejar un comentario, o enviar un trackback desde su sitio.